كلام الناس

كلام الناس وحجي الناس من اكثر المشاكل اللي تواجه الكل وبكل تفاصيل حياتهم

للاسف احنا بمجتمع يحب يتكلم ويعطي كلام الناس اهمية كبيرة

ماراح اتكلم بالموضوع بكل تفاصيله لكني باخذ جزئية منه

كلام الناس عالحب و الزواج

*

*

الواحد لما يحب ويعيش قصة حب ينسى نفسه وايد و القلب اهوه اللي يكون متحكم بكل تصرفاته

و قرارات عقله تكون ثانوية و ما يحط لها اهمية

لكن لما تصير الصجية لما يبي يتزوج اللي يحبها يبدا يفكر شوي ويبدا ياخذ راي عقله

و تصير مشكلة كبيرة لما تكون اللي يحبها مو على المواصفات اللي الناس متوقعينها

سواء مطلقة او ارملة او عندها عيال او متينة او طويلة او قصيرة او اهلها مو نفس المستوى او اي شي ثاني

يبدا كلام الناس ويبدا التحلطم و التشيش

و كلام الناس هذا يأثر بشكل كبير على قرارات الزواج

و ياما ناس او حبايب ما تزوجوا من كلام الناس

فلان ما عنده شهادة شلون تتزوجينه

الناس شنو راح تقول عنا

بنتي ماخذه واحد مطلق

او شفتوا فلانة من خذت

او فلان من تزوج

الخ الخ الخ

ليش الواحد يهتم بكلام الناس ؟؟!

ليش الواحد ما يقدر يعيش حياته مثل ما اهوه يبي

ليش يخلي كلام الناس تأثر على قراراته حتى لو اهوه راضي فيها ؟

الناس شنو تستفيد .. ليش تتكلم

ليش ما تخلي الواحد يعيش حياته

ولي متى احنا راح نعطي كلام الناس اهمية

ليش الواحد لما بياخذ قرار بحياته لازم يرضي الكل الا نفسه

ليش الناس ما تقدر ان الواحد ما يعيش الا مرة وحدة ولازم يعيشها مثل ما اهوه يبي

اذا اهوه راضي ليش يتدخلون؟

ادري ان وايد ناس تقول الواحد لازم ما يتأثر

واللي يحط قيمة لكلام الناس ماعنده شخصية الخ الخ

لكني اشوف هذا شي طبيعي

لما يصير على طول هذا الكلام اللي يصير جدامه واللي يسمعه

اكيد ماراح يقدر يعاند ولاراح يقدر يواجه الكلام

والشيطان شاطر

.

.

والناس شنو تستفيد

واللي يقهر مرات نشوف ان الناس اللي تتكلم تروح تزوج بناتها من نفس اللي عيبت عليهم

يعني والله شي يقهر ويعور القلب واحنا نشوف حبايب يفترقون عشان كلام الناس