يحفظج ربي يا كويت

مرت 16 سنة عالغزو

ويحز بخاطري ان هالتاريخ مر بدون محد يهتم

بدون محد يلتفت

طبعا بيني وبين نفسي حلفت اني ما راح انسى هالتاريخ

2/8

وكل ما يمر راح اتكلم عنه واتذكر تفاصيله كلها

*

*

كنت صغيرة بهذاك الوقت وما كنت مستوعبة شنو يعني العراق دشت الكويت

اللي اذكر اني كنت اشوف امي دايما تبجي

ما كنا موجودين بالكويت حزتها

كان الصيف وكنا مسافرين

اذكر شلون اول ما سمعنا الخبر

امي اغمى عليها وخالتي كانت تبجي

وانا اطالعهم وموفاهمة ليش كل هذا قاعد يصير

واذكر فرحة التحرير

شلون الكل كان طاير من الفرح وكل الكويتيين والخليجيين طلعوا مسيرة

اذكر الباجات و رشاشات الصابون اللي كانوا يبيعونها

*

*

دايما احب اسأل اللي كانوا موجود بالديرة

شنو كان شعوركم

شنو كنتوا تحسون

شنو شي صار جدامكم او سمعتوه

لان برايي ان هالشي المفروض محد ينساه

ويضايقني لما اقعد اسولف مع الصغار

اللي ما عاشوا هالفترة

ويطلعون ما يعرفون شي غير ان العراق دشت الكويت و حرقت الآبار

ويضايقني اكثر التجاهل الحكومي لهالشي

لان هالشي مو قاعد يدرس

ولا احد قاعد يدعم فكرة تخليد ذكرى الاسرى والشهداء

*

*

قبل فترة زرت بيت الكويت للاعمال الوطنية

واللي مو رايح له لازم يروح له

ولازم يقول حق كل اللي يعرفه انه يروح له

هو بيت يشرفون عليه متطوعين ( للاسف)

والحكومة ابد مو داعمته

وبالعكس يحاولون يشيلونه

يجسد كل شي صار بالغزو

اي احد ما كان بالكويت

اي احد ما عاش الغزو والتحرير

لازم يروح عشان يعرف بالضبط وبالتفاصيل كل اللي صار

قمة في الروعة

ومكان حيل متعوب عليه

**

ادري طولت حيل بالموضوع و افكاري مو مترابطة

واعذروني لهالشي

واتمنى ان محد ينسى

و نخلي كل الاجيال اللي ما عاشت الغزو تعرف شنو صار بالغزو

وانا وحدة عمري ما راح انسى

وماراح اقبل باني اقول هذا غزو صدامي مو عراقي

لان مو صدام اللي دش بيوتنا وباق حلالنا

واغتصب بناتنا وذبح شيابنا و اسر شبابنا

و شوه طفولتنا

وياريت من حكومتنا ماتحاول تشطب هالشي من التاريخ

و يحفظج ربي يا كويت