قرقيعان .. الجزء الاول

كالعادة في رمضان تكثر المسلسلات والبرامج التلفزيونية

ويتفاوت مستواها

للامانة هالرمضان ماشفت شي و ماني قادرة الحق على شي

وقتي مزحوم عالآخر

لكني اتابع مسلسل الفرية

واعتبر التمثيل فيه طبيعي جدا ومسلسل ممتاز

تمثيل هند بالمسلسل اكثر من رائع

**

**
رمضان هالسنة غير

ليش مادري

ماكو وقت .. مزحومة ومشغولة

لاني قادرة اوجب ولاني قادرة ازور ولاني قادرة اسوي شي

وبيني وبين نفسي اتمنى ان محد يزعل علي او يتشره

لاني قاعدة احاسب نفسي وايد

**

**

الواحد برمضان يشوف اشياء غريبة الصبح

من لبس ومكياج

يعني استغرب من اللي نشوف على عينهم كل الالوان الفسفورية

بس ما يحطون حمرة

يعني اهمه صايمين !!

انزين وين احترام هالشهر

يعني شدعوة ما تقدرين تستغنين عن المكياج كلش

انزين كلش كلش كلش ما تقدرين حطي شي خفيف وطبيعي

ولا اللبس
انزين احترمي هالشهر

على الاقل الصبح

مناظر تفشل .. انا استحي لما وحدة تمر بهالمنظر واشوف الشباب نزلوا عينهم واهمه متضايقين

يعني احترامج لهالشهر راح يزيد احترام الغير لج

**

**

الواحد برمضان يحاول كثر ما يقدر يحسن من اخلاقه

لكن في اشياء الواحد ما يقدر يتحملها ويحطها بقلبه لانه صايم

بس اليوم صار معاي موقف وماقدرت امسك نفسي

وانا بروحه ضغطي نازل وصداع والشمس طاقة براسي

.

كنت رايحة الجمعية وحيل كان زحمة

كنت ناطرة سيارة تطلع عشان اوقف مكانها

ولا سيارة ثانية تيي وتصفط على طول

انا انصدمت

ويهي صار عليه علامة استفهام

مع ان حدي تنرفزت بس سكت

بس شنو الشي اللي قهرني

ان اللي داخل السيارة سايق هندي

صفط السيارة ونزل و وقف قبالها ناطر معزبته تطلع

هني ما قدرت اسكت وما حطيتها بقلبي

جان اوقف ورا سيارته وسكرت عليه

ونزلت قطيت عليه جم كلمة وقلتله انا نازلة الجمعية ومتى ما طلعت انت راح تطلع

:):)

يعني استغفر الله الواحد مرات يطلع عن طوره واهوه ما يبي هالشي

**

**

رمضان كريم