art group

احلى لحظات العمر تمر وللاسف بسرعة

ما حسيت بالوقت كلش

لان الوقت الحلو يطير ومحد حاس فيه

وللأسف ما يرجع

*

*

بداية المشروع :

اتصال من اعز صديقاتي

افراح

تقوللي فيه عن مشروع كويتي ضخم

هدفه رفع اسم الكويت فوق

حبيت الفكرة اللي قالتها و وافقتها فورا اني اشترك

لان احب العمل الجماعي

اتفقنا ان نروح الاجتماع اللي راح يسوونه منظمي المشروع واتفقنا ان نبدي بتاريخ الجمعة 15 -9

*

*

اول يوم بالمشروع :

لظروف حصلت لي ما قدرت اروح اول يوم

ورحت يوم السبت لموقع العمل

المكان اللي راح نشتغل فيه لمدة 3 اسابيع

ما كنت اعرف احد من اللي مشاركين

واول ما دخلت حسيت بغربة وخوف وبنفس الوقت استانست

شفت الكل مشغول واللي يرسم واللي يلون واللي مشغول بنقاش حاد

حسيت فيهم همة مو طبيعية و لهفة على الشغل

و مسكت الفرشة وقعدت اشتغل معاهم

مع ان محد قاللي او وجهني

حسيت شوي بالغلط

واللي كانوا موجودين حسوا

اذكر ان واحد من الشباب الموجودين توجه صوبي و سألني شنو اسمج وقلتله

ومن يومها اهوه كان ال guide

محمد

قاللي شنو راح نسوي وقاللي شنو المطلوب منه

طبعا كل شي كانوا موفرينه لنا من الوان و فرش و مكان

*

*

القروب :

طبعا لاني كنت ضايعة فدخلت بقروب من القروبات اللي كونوها

وبديت اشتغل معاهم من اول يوم بالمشروع لآخر يوم

حسيت بالكل مثل الاهل والكل على قلب واحد

واشتغلنا واشتغلنا واشتغلنا

وبنفس الوقت ضحكنا و سولفنا و كانت بيننا مواقف وايد حلوة

تناجرنا و تهاوشنا و بجينا مثل ما كل الاخوان يسوون

حسيت اني دخلت بعايلة يديدة مكونة من 33 شاب وبنت

*

*

الاشخاص :

ناس دخلت وانا كنت اعرفهم معرفة شكلية

يعني كنت اشوفهم بمعارض الرسم بس ما كان بيننا اي تعارف

حتى الاسم ما كنت اعرفه

ناس دخلت وانا مو شايفتهم ولا مرة

وناس دخلت وانا اعرفهم معرفة سطحية من قبل

لكن طلعت وانا احترم الكل و اكن بقلبي محبة كبيرة للكل

*

*

بالمشروع زارتنا كثير من الشخصيات و كانوا ضيوف شرف غالين على قلوبنا

بالمشروع صارت كثير من المواقف المضحكة والطريفة

بالمشروع كل شاب وبنت كانوا مثل الاخوان

ما كان بين اي احد نية مو صافية

بالمشروع كلينا مع بعض و طلعنا مع بعض

بالمشروع ما حسينا ان احنا بمشروع

وكل واحد حس انه راح بيته

*

*

مشاعر :

كنا نتيمع بالمرسم قبل الفطور وبعد الفطور

كنا مع بعض طول اليوم

لدرجة كنت اشوفهم اكثر من اهلي

كنت احس بالتزام فضيع تجاه هالمشروع

لدرجة ان الكثير شاركوني هالاحساس

الاحساس ان نبي نفتك من الدوام وننحاش منه عشان نروح بسرعة المرسم

ما كنا نرد البيت الا عشان الفطور

و ما يمدينا نخلصه الا وردينا المرسم

سواء كان عندنا شغل او لا

وبكل اختصار ما كنا نبي هالمشروع يخلص

*

*

*

الحفلة :

كنا مقررين ان اخر يوم نسوي حفلة

تجمعنا كلنا مع ضيوف شرف

وبدا التخطيط للحفلة بين 3 بنات

وكنت انا وحدة منهم

حبينا نسوي جو ونغير عن مكان المرسم

وقررنا نسوي البوفيه على حمام السباحة الموجود بالبيت

وبدا التنفيذ بآخر يوم

*

*

اخر يوم :

من الصبح كنت موجودة انا وبعض الشباب والبنات

كنا نرتب المكان و حطينا الطاولات وزهبنا الشموع و كل شي جهزناه

وبعد الفطور الكل تواجد هناك

وكل واحد بايده طبق

:)

انصدمنا و تفاجأنا بالضيف

لان مثل ما وعدونا الضيف كان محبوب من الكل

صالح العجيري

و كان يسولف لنا و يقول عن ذكرياته

الكل استانس من هالمفاجأة الحلوة

عقبها نزلنا عند البوفيه

وبدينا نصور و سوالف وضحك

طول الوقت كنت ماسكة دموعي

مابيها تنزل

ماني قادرة اصدق ان 3 اسابيع تخليني اتعلق بناس عمري ما شفتهم ولا عرفتهم

ماني قادرة اصدق ان خلاص

قبل الفطور وعقب الفطور ما راح اروح المرسم

ماني قادرة اصدق ان كل شي انتهى

وقدرت لفترة صغيرة اني امسك نفسي

لكن ماقدرت لما شفت واحد من الشباب

ومن اكثر الشباب اللي اعزهم واحترمهم اييلي ويعطيني الجاكيت عشان اكتب له كلمة تكن للذكرى

دموعي نزلت بدون استئذان

والكل انصدم بس عاذرني ومحد كان يبي يطالعني عشان لا يتأثر

قعد عندي صاحب الجاكيت وقاللي كلمة حيل مأثرة فيني

" يعني خلاص .. بعد ما راح نشوف بعض ؟ "

قمت ابجي اكثر واكثر والبنات قاموا يواسوني ويلموني عشان اهدا

والشباب كالعادة يتطنزون :)

عقبها كل واحد قدر يحصل له ورقة قام يعطيها حق الموجودين عشان يكتبون له

بنات وشباب

عقب الغبقة

فاجأتنا وحدة من البنات انها مسوية فيلم وحابة تعرضه لنا

قعدنا كلنا وجابلنا اللاب توب وبدا عرض الفيلم

صورنا من بداية المشروع

والمواقف و وقت الشغل و اللقطات كانت حيل مؤثرة و معبرة

عقب الفيلم محد قدر يمسك دموعه الكل قام يبجي

طبعا انا ماصدقت

كملت البجي :)

شباب وبنات قاموا يبجون

بس في واحد من الشباب ( صاحب الجاكيت ) حب يسوي شي يطلعنا من الجو

مع ان مسكين كان حده كاشخ ومغتر

لكن تنازل عن كشخته في سبيل اضحاكنا و طب بالحمام السباحة

ولحقوه بعض الشباب :)

حسينا ان فعلا كل شي انتهى

قعدنا فترة طويلة ومحد وده يطلع من المكان

لان الكل يدري اذا طلعنا محد راح يرد وكل شي ينتهي مع طلعتنا

*

*

وعود :

وعدنا بعض ان نكون دايما على قلب واحد

وان دايما نكون علىاتصال

ونحاول كثر ما نقدر ان نتيمع ونشوف بعض

واتمنى هالوعود تكون صج

لاني حيل حبيتهم

وحيل راح افقدهم