تحلطم
فترة طويلة ما كتبت ما عبرت
ما طلعت اللي ببالي
واللي قاعدة افكر فيه
مع اني يوميا ادخل وافتح هالصفحة و بالي يكون متروس
لكن مادري ليش
اعجز اني اكتب اي شي
لان احس ان اي شي راح اقوله سخيف
كل يوم
لكن اليوم قررت اني ادخل واكتب
تحطلم كالعادة
شنو عندي غير التحلطم
---
تحلطم رقم 1
24-1
كان عيد ميلادي
وايد احب هالتاريخ
ودايما قبله باسبوع اكون حدي متشوقة ايي هاليوم عشان اشوف منو يذكرني
منو اييب لي هدية
منو و منو و منو
بس هالسنة كان غير
كنت مهددة الكل ان مابي احد يتذكر
مابي اكبر
بس خلاض كافي
عاجبني عمري الحين
مابي بعد سنة
اذا كبرت بعد سنة راح اقرب من الثلاثين واذا قربت من الثلاثين راح اقرب من الاربعين
مابي عاجبني عمري
خلاص انا راضية
بس مر هاليوم
و لأنه كان يوم كئيب بالنسبة لي
ما استمتعت فيه كلش
وكان ضايق خلقي مع ان حبايبي ما قصروا معاي كلش
بس بالاخير فكرت فيها
so what ?@
26
ولا 27
شنو فرقت ؟
كلها رقم
صح !!! ولا قاعدة اقص على عمري ؟؟
--
--
تحلطم رقم 2
شنو يعني بالكويت راح يسوون قانون حق المدونات ؟
وين قاعدين ؟؟
وين حرية الراي
وين حرية التعبير
المدونة بالنسبة لكثيرين مو مقالات سياسية
المدونة بالنسبة لكثيرين متنفس
المدونة بالنسبة لكثيرين diary
هل يحق لأحد انه يتدخل باللي نبي نكتبه
هل عقب هالقانون المدونين راح ياخذون راحتهم ؟
انا ضد
وضد وضد
ما راح ارضى بهالقانون السخيف
المواطن له حق بالتعبير عن رايه
و له حق بالتحلطم على مجتمعه
ولا انتوا شرايكم ؟
-
تحلطم رقم 3
دولة نفطية مثل الكويت
بعز انتاجها و بعز ارتفاع سعر برميل النفط
هل راح يأثر زيادة الراتب مبلغ محترم حق المواطن الكويتي
يعني ليش لازم المواطن يطررر عشان يزيدون المعاشات زيادة محترمة ؟
-
تحلطم رقم 4
ثوابت الامة ؟؟ وين موقعهم من الاعراب
اللي اعرفه
عندنا سلطة تشريعية
وسلطة تنفيذية
وسلطة قضائية
اهمه شكو
وعلى اي اساس يبون يفرضون نفسهم على المجتمع ؟؟
-
تحلطم رقم 5
لي متى الكويت متخلفة ؟
الله يشهد اني احبها
ما اقدر استغني عنها بس لي متى اهيه جذي ؟
وادري ومتأكدة من ان وايد يشاركوني بشعوري
الكويت من ناحية الاقتصاد دولة غنية
بس الفائض المالي الضخم وين قاعد يرووووح ؟؟
ليش ماكو مستشفيات يديدة على مستوى ؟
ليش المواطن اذا صارت فيه علة لازم يسافر يعالج بره ؟
هل الكويت عاجزة انها تبني مستشفيات على مستوى وتييب طاقم طبي على مستوى ؟
خلونا من المستشفيات
عندنا جزر ؟؟ ليش ما يستغلونهم
ليش ما تكون الكويت دولة سياحية ؟
بتقولون لي الجو ما يساعد ؟؟ جو الكويت وايد احسن من جو دبي
بتقولون لان ماكو خمر و كازينو ونايت كلوب
مو شرط .. مو كل الناس يسافرون عشان هالشي
مشروع جسر الصبية
مشروع تطوير جزيرة فيلكا
مشروع حقول الشمال
مشاريع لي الراس
ليش صارلها اكثر من 10 سنين وما شفنا شي
تبوون تنتفعون
انتفعوا عليكم بالعافية
بس سووا شي حق الديرة
منو المسؤول ؟ ولي متى هذا الوضع ؟
-
تحلطم رقم 6
هالاسبوع راح يكون الفالنتاين
في ناس ضد وفي ناس مع
وانا احترم راي الاثنين
لكن على أي اساس في بعض النواب يبون من وزير التجارة بممارسة مسؤولياته للقضاء على مظاهر الاحتفال ومنع المحلات من انهم يبيعون اشياء تتعلق بعيد الحب ؟
اتوقع ان اذا الشخص يبي يحتفل بعيد الحب له مطلق الحرية
ما اتوقع في شي غلط
واللي ما يبي يحتفل يسلم راسه لا يحتفل
بس على اي اساس تبون ان المحلات يمنعون كل شي يتعلق بالفالنتاين ؟
هل لهم حق بانهم يتدخلون حتى بطريقة تفكير المواطن ؟
انا شخصيا ارفض رفضا تاما بأن ايي اليوم اللي احد يفرض فيه علي اذا كنت احتفل بالفالنتاين ولا لا
ارفض ان احد يقولي سوي او ما تسوين
واليوم اللي راح يمر فيه بالكويت
راح يكون فيها نفس السعودية
ناس يفرضون علينا شنو نسوي
انا اول وحدة راح اطلع من هالديرة
--------
بالأخــــيـــــــــر
يوم الخميس عيد الحب
اللي عنده شخص يحبه
لا يقصر عليه
هالمناسبة ما يبيلها هدايا غالية او احد يتعب نفسه
مجرد يوم للرومانسية
ابتسامة
كلمة حب
وردة
لا راح تأثر على الميزانية
بس راح تاُثر على العلاقة
اما ال single
لا يضيق خلقكم
انشالله السنة الياية ما تكونون بروحكم
واستغلوا هالعيد انكم تقولون حق الناس اللي بحياتكم انكم تحبونهم
posted by PearL at
10:35 PM
7 Comments:
bil nesba 7ag ragam 5 a7eb azeed..ma3gola a rich country like kuwait tab6er il mowa6enen yetbare3on 7g insha2 il mestaw9efat il yededa!! walah shay yetha7ek o yefashel ib nafes il waqt!
هاااي اشتقنااالج وااايد
1
كل عام وانتي بالف خيير و انتي شباب و صغيره للحين تو الناس على انج تكبرين عمرج
عاد احلى شي الهداا انشالله حصلتي اشياء غاليه
:P
lol aham shay el '3aly
2
o
3
o
4
o
5
والله تعبنا من سيرتها عيزو الناس تتحجه بس امبي مادري تصدقين احسبس خلاص بتصير يوم القيامه
الديره صايره تخرع و كلمن ياكل بالثاني
الله يستر
6
تصدقين اليوم المدرسات بغو يتماجعون بهالسبه لوول ناس تعارض و ناس مع
تره صج يني كل واحد و حريته يسوي الي يسوي الباجي له شغل بنفسه
و اشوه ذكرتينا العزابيه لول
انا الصراحه بروح اشتريلي ورده و بعطيها حق نفسي هديه
عشان ما اتأزم
:P
salamz sweetee...
أخيراً نزلتي بوست يديد
وااايد طولتي
:)
كل عام وإنتي بخير
وإن شاءالله العمر كله
ولا يضيق خلقج
عيشي حياتج ولا تفكرين بالعمر
لأنه يمشي على أي حال
قانون المدونات شي فاشل ومرفوض
:
أما عيد الحب
فهو مثل ماقلتي بالظبط حرية شخصيه
إللى يبي يحتفل خل يحتفل
أحتفاله ما راح يضر أحد
يعني صعب إنك تفرض على الناس شلون تتصرف
:
وكل عام وانتي بألف خير
على شان عيد ميلادج وعيد الحب
:)
waaaay tawech 9geeera 7ram 3aleeech ;) am 26 o i feel happy el9ra7a :)
o yah velntine kil wa7ed khal y7tfel 3laa keefa
عاد و الله ودي بوردة :)
This comment has been removed by the author.
حبيبتى والله كل عاام وانت بالف خير
ولا تحسبين العمر اذا بازمج احتفلى باليوم وانتهينا هههههههههه
وهاليوم انا بعد احتفل بعيد ميلاد انسانه عزيزه عيد ميلادها 24/1
وعلى الكويت
فوالله ما ادرى شقاعد يصير يا بيرل
احس كل مالنا وبالنازل
:(
الشكوه لله
الله يحفظنا بس
وكل عام وانت بحب وسعاده وصحه وعافيه
:)
احلى تحلطم بالدنيا
كل عام وانتي بالف خير وعقبال الميه
ترى عادي 26 او 27 او 30 كلها ارقام بس الروح شلون والحيويه
احلى شي لا صار القلب مليان حب ما يهمه اي شي بالدنيا
عسى الفرح دوم عند بابج حبوبه :)
Post a Comment
Subscribe to Post Comments [Atom]
<< Home