تفاصيل

الساعة 2.30

الغرفة هادية

ماكو أحد .. أو بالأصح ماكو أحد قاعد

زوجي وبنتي نايمين

وأنا اتمشى بالغرفة بروحي

أشوف الفيو

المنظر وايد أحبه

كثر ما أحب منظر الطبيعة لما اشوفه من الدريشة

كثر ما أحب منظر نيويورك والعمارات و الاضاءات

أســرح بالمنظر .. أعيش بحالة تفكير

حالة التفكير عندي هي حالة مشاعرية بحتة

أفكر بناس أحبهم

أفكر بمواقف .. بتفاصيل بأتفه الأشياء اللي تجمعني مع أحبائي

أعيش بالتفاصيل

يـــــــــــــــــــــــــــــــــــــــاه

التفاصيل

غريبة شلون التفاصيل تكون كل شي

وهي أساس كل شي

لكن نغفلها .. ننساها وما نهتم لها

قعدت على حافة الدريشة .. كأني راح اطيح .. المنظر جدامي وتحتي

محاطة بمنظر نيويورك

الغرفة ظلمة .. ومافيها ولا صوت

تذكرت تفاصيل كثيرة بحياتي

تذكرت تفاصيل ما كنت اذكرها

كانت لحظة خاصة للتفاصيل .. لحظة عطيت فيها التفاصيل حقها

لأول مرة استوعب شنو أهمية هالتفاصيل بالنسبة لي

تذكرت شي دايما أسويه مع ابوي

من صغري وانا اسويه

وبهذيج اللحظة حسيت بقيمته و لو انه سخيف

دايما ابوي ينسى مفتاح سيارته بغرفته .. وما يتذكره الا لما ينزل عند الباب الرئيسي قبل ما يطلع من البيت

دايما كنت انا اللي اييب له المفتاح قبل ما ينادي باسمي عشان اييبه له

كنت اوقف بأعلى السلم و اهوه أسفل السلم

يقولي لا تنزلين بس حذفيلي المفتاح

كنت احذفه واهوه يمسكه

بصغري كنت مذهولة شلون ابوي

hero

لو شنو كنت بعيدة عنه كان يمسك المفتاح

:)

أحب هالكونكشن اللي يصير بيني وبينه

تذكرت اللحظة اللي دخل فيها مع زوجي بالعرس

اذكر دمعته اذكر لما وقف يمي وقاللي حتى وانتي الحين بعرسج راح تظلين طول عمرج بيبيتي

_

سرحت بالتفاصيل اللي جمعتني بأبوي وايد

لاني كنت دايما قريبه منه

دايما كنت دلوعته

دايما اهوه كان موجود عشاني

وهالشي عمره ما تغير

-

تذكرت التفاصيل اللي جمعتني بصديقة عمري وبنت خالتي وكل شي بحياتي

تذكرت ابسط واسخف التفاصيل

من التفاصيل اللي تجمعني فيها

ما تنام الا اذا دقت علي وقالت لي

goodnight .. sweet dreams 7uby

وما انام الا اذا دقيت عليها قلتلها نفس الشي

اذكر في يوم

ما كنت أقدر اكلمها بالليل

ولا قدرت أقولها تصبحين على خير

دقت علي وما رديت عليها .. بس على طول دزيت لها مسج

حياتي انا ماقدر اكلمج اليوم كلش .. سوري حياتي بس انشالله اعوضها عليج باجر

ردت علي بمسج للحين محتفظة فيه و وايد يضحكني

كاتبتلي فيه

اوهوووو .. بروحي ضايق خلقي

يالله قووو دريم .. بطوفها هالمرة على مزاجي

.

عقبها وايد قمنا نضحك على هالمسج .. ريلها يقولها اذا انا كنت مشغول عنج ما راح تعصبين

-

كنت قاعدة بروحي وأبتسم

اشوف زوجي واهوه نايم

اشوف بنتي واهيه نايمة

واستمتع بكل التفاصيل

أحب الناس الموجودين بحياتي

واحب كل التفاصيل

لأن كل التفاصيل اهيه اللي تعطي حلاوة لكل شي

اهيه تعطي النكهة

اهيه اللي تكون الشكل النهائي للمواقف والعلاقات