شعور يعور
من اول نظرة خذا قلبها
شافته واقف مع ربعه يسولف ويضحك واهوه ينطر طاولة
شي فيه جذبها
لدرجة انها نست نفسها وقامت تطالعه
نبضات قلبها فضحت اللي حست فيه
شي غريب الانجذاب اللي يصير من اول نظرة
هل في حب من اول نظرة ؟
-
هالشي تأكدت منه لما كنت معاها وشفت نظرة عينها واهيه تطالعه
طول الوقت واحنا نتغدا حاسة فيها
اول مرة اشوفها جذي
كانت تحاول كثر ما تقدر انها ما تطالعه لكنها ماقدرت
حاولت اني الهيها
اسولف معاها
اسألها شدعوة شصار فيج
شنو اللي فيه غير
تطالعني بنظرات اول مرة تطالعني فيهم
حسيتها تقولي وايد اشياء بدون ولا كلمة
عرفت شعورها
مريت فيه من قبل
......
....
مرت الايام والشهور
ونسينا السالفة او بالاحرى انا نسيت السالفة
كان ببالي انه
مجرد شخص فز له قلبها لفترة وخلاص
===
-
تتصل فيني على يوم
وتقولي انها تبيني اروحلها الدوام الحين
صوتها كان غير
نبرتها كانت غير
احساسها كان غير
رحتلها الدوام ودخلت عندها المكتب
كانت غير
مرتبكة
مستانسة
متوترة
احساسها كان غريب
مزيج من كل المشاعر
سألتها شفيج شصاير
طالعتني بنظرة نفس نظرتها القديمة
الحب
عرفت نظرتها على طول
بس معقولة اللي ببالي !!!
--
فهمت السالفة منها
موظف يديد بدوامها
تكتشف انه اهوه
اللي خذا قلبها
بهذاك المطعم
--
مع مرور الايام تطورت علاقتهم من الزمالة الى الصداقة
واهيه كانت تحلم انها تتطور اكثر
كان بالنسبة لها صج حلم
لما كانت تتكلم عنه
لما كانت تشوفه
كل شي تغير فيها
لكن علاقتهم ما تغيرت
علاقة صداقة فقط لا غير
كان وايد يرتاح لها
وايد يستانس عليها
وايد ياخذ راحته معاها و يوله عليها
...
في يوم من الايام
كنا طالعين مجموعة من البنات
كانت معانا
وبالصدفة شفناه بالكافيه اللي كنا رايحين له
كل شي مر عادي
مرت الايام واهيه تحس ان في شي
معاملته لها ما تغيرت
لكن اللي تغير اهتمامه باحدى صديقاتها
كان دايما يسال عنها
لما بتطلع يسالها اذا كانت راح تطلع معاها
كانت تحاول كثر ما تقدر تطنش الشعور اللي حاسه فيه
و تحاول تقنع نفسها ان مو معقولة اهوه معجب برفيجتها
--
-
قبل يومين تتصل فيني تقولي انه بكل بساطة قالها انه وايد معجب برفيجتها
==========
==========
----
شعور يعور لما الوحدة تحس ان عالمها كله ينهار عشان شخص يحب غيرها
شعور بايخ لما الوحدة تعطي وتعطي وتعطي عشان اللي جدامها ينتبه لها وبكل بساطة ايي يتكلم ويشكيلها حاله مع وحدة ثانية
شعور حقير لما اللي تحبينه ينسى روحج و اهتمامج و كل شي فيج عشان شكل وحدة .. باختصار مجرد شكل
----
وبالاخيراهداء
--
لا ياقلبي لا تكلم
لا ياقلبي لا تتألم
هذا هو اللي تحبه
لو نسيته كان ارحم
posted by PearL at
12:30 AM
23 Comments:
تصدقين هذا الشي اللى يحير
اهو ما حبها رغم كل اهتمامها
ونظراتها وحبها
وأعجب بوحده ثانية
هذا الحب ماله أبد قانون
فعلاً شعورها شعور يعور
صعب جداً لما تشوف الإنسان اللى تحبه يكلمها على وحده ثانية
على قولتج
شعور حقير
( عجبني هالتعبير )
حالتة ذكرتني في بيت شعر
إللى يبينا عيت النفس تبغيه
وإللى نبيه عيً البخت لا يجيبه
ايييي نسيت اقولج
الصوره عجيييبه
روعه
صج شعور بايخ و يعور
بس يا بيرل
صديقتج لما أول ما انجذبت له مو كان الشكل؟؟
يعني قلبها فز له و هي ما تعرفه
مجرد شكل
نفس الشي هو من حقه قلبه يفز حق وحده من مجرد شكلها لأن هذا أول شي يجذب الناس لبعض
كونه يرتاح لها و يستانس عليها مو معناه انه لازم يحبها
الله يعوضها بواحد أحسن منه ان شاءالله
المشكله انه مجابلها بالدوام
:/
الله يعينها
تحياتي لج
ولهانه عليج
:******
وااااااااااااي عورة قلبيييي
بعد عمريي صج صج صج شعوووور يعور القلب
تصدقين كنت اقول انه يمكن لي حبيت بدون ما اقول حق الي احبه اهون من اني اقوله و ما يبادلني
بس ياربي بكل الحالتين فيها كسره قلب
الله يسمح على قلبها و يصبرها بعد عمري
salamz sweetee....
حزنتينى بهالقصه
قلبي عورنى عليها
بس تدرين
غلطتها
الكتاب مبين من عنوانه
اهو يعدها اخت وصديقه
يعنى كان لازم ما تتأمل ولا تنتظر منه شي
وتبتعد عنه
حراام والله عورنى قلبى مسكيينه
من جذى البنت لازم تتاكد من قبول الطرف الثانى قبل لا تكبر مشاعرها
لان لو كانت تدرى كانت سوت كنترول
اعرف وحده نفس قصتج بالضبط
ينت عليه من اول مره شافته
واهو حبيب مع الكل بشوش وسمح
ويعاامل الكل بنفس الطريقه
استوعبت اهى ان هذا طبعه مع الكل
ما تمينا الا نسمع ان خطب
:*
معروف إن العين أول من يحب
بس الشرهة على البنية يمكن ما لمحت له عدل
أو إنها لمحت وهو ما يفهم
أو إنه يتعمد يسوي جذي علشان
يوضح لها إنها مجرد زميلة مو أكثر
مشكلتكن يا بنات في المجتمعات الذكورية
أنكن ما تعبرون عن اللي بداخلكم
والعذر إنه عيب البنت تقول إنها تحب
وعقبها ما نشوف إلا دموع وألم وعذاب
كان الله في عونكن
ودمتن بحب وود
وي مسكينه!!!
معاي وحده بالدوام نفس الشي وحاسه ان بيدقرها امممممم او تدقره اممممم
الله يكون بعونها..:)
7osen
صج الحب شي غريب
ماله قانون ابد
و شي وايد يعور لما اللي تحبه يسولف لك عن احد يحبه
الله لا يبلينا
7osen :
عيونك الحلوة :)
purpelitious
المشكلة اللي جذبها في مو شكله
لان اذا على شكله وايد في احلى منه مع انه مزيون
اللي عجبها فيه شي ثاني
وهذي المشكلة
ان معاها بالدوام
يعني حتى لو تبي تنسى صعب
ولهت عليج العافية ياعمري
خروفا
الحب بكل حالاته عوار قلب
قلتي للي تحبينه ولا ماقلتي
نفس الشي اذا ما كان يبادلج الشعور
زوزوتا
بالضبط
اهيه ما كان المفروض انها تتأمل
لكن الوحدة لما تحب
ما تقدر تسيطر على نفسها
كاريزما
اي هذا بعد الظاهر طبعه جذب
حبيب مع الكل وهذا طبع فيه
بس ماعليه
انشالله تحصل اللي احسن منه
سلوقا بلوقا
انا برايي لازم البنت حتى لو كانت تحمل مشاعر تحتفظ فيها لنفسها عشان ما تحط نفسها بموقف بايخ
المبادرة بالاعجاب لازم تكون دايما من الريال
كويتية
هذي المشكلة
لما يكون معاها بنفس الدوام
shu3oor mo bas e3awer ela yethba7! thakartene eb wa7da mn el banaaat tkhayelay wa7id kanat 7addha meshta6a 3laih wo nathrat wil 7ala 7aala abad ma9ar shahar ela ohwa daglaha kan embayen y3nee ena 7ata ohwa y6ali3 wo chethe wo ma6ala3 raqemha ela ena ohwa 9ej bagheeeha .. wetkhayelay mar shahar shahrain thalath wehya tkalma 3ady y3nee wo magalaha ena mo3jab aw shay chenhum friends bes ehya salfat ena ohwa dag 3laiha eb 7ad that;ha 6ayerat;haa fooog elsema lanna ma6ala3 raqemha ela ohwa 9ej mo3jab feha 7ata lo maygool bel akheer e6la3at ehya mojarad jeser 3shan yabe yo9al 7ag refejat;ha maskeeena walllah thakeratne feha bethab6 7ata egolaha ana em6ali3 raqmich lanna mit ba3aref ele weyach menoo ma3araft wentay 3araftech menoo 6a3ay el 7aqara!
ليش دايما من الريال
؟؟
البوح بالمشاعر من مقصور على الريال بس
حتى البنت من حقها تقول
وفي هالوقت أغلب الرياييل ما يبوحون
لنفس السبب
علشان لا يطيح بموقف بايخ
ولهذا البوح مطلوب من الطرفين
ودمتم بحب وود
شكشكة
أححححح
صج الرياييل ما يفكرون الا بنفسهم
اذا يبون شي يوصلونه يوصلونه حتى لو الطريج على حساب الغير
سلوقا بلوقا
بس فرق بين ان الريال يندقر وبين البنت لما تندقر
بالعكس البنت عليها انها تبين بطريقة كلامها
ايحاء مو تقول اشكره
بس الريال يقدر يتحمل رفض المرة
بس المراة لا ما تقدر
يمكن أتفق اتفاق جزئي
لأن البنت عاطفية وحساسة
ممكن تتأثر لفترة معينة
ممكن تكون سنة وممكن تكون عشر
لكن الريال لما يتأثر بقى طول عمره متأثر
لأنه مو عاطفي مثل البنت
فإذا انصدم في عاطفته ممكن تأثر عليه طول العمر
حتى لو اعتقد إنه حب وحدة ثانية لكن تبقى الدقرة في قلبها ما تنمحي
ما أقول هذا الكلام من فراغ
من كثر ما سمعت عن قصص الحب
عند الشباب
وياما شفت دموعهم وكنت أعتقد إنهم يلعبون
لكني اكتشفت إنهم لي الحين مو قادرين ينسون حبهم
وبالمقابل في بنات انتهى الحب وتألموا فترة
لكنهم مع الوقت نسوا
وبالنهاية تبقى المسألة نسبية
ودمتم بحب وود
sologa bologa
احترم رايك
لكني ما اصدقه للاسف
الريال بسرعة عنده يبدل
مشاعره بسرعة تتبدل
الريال أساسا يفكر بعقل عكس
المرأة عاطفية
لكن اذا تحكمت فيه عاطفته وانجرحت
يبقى الجرح داخله لو شنو يصير
يضحك جدام الناس لكن من داخله يبكي
لو حالة وحدة مرت علي جان قلت حالة عابرة
لكن ليست واحدة ولا اثنتين ولا ثلاث بل أربع حالات فعالة
:)
عيل الله يعينهم
بس غريبة
احس صعبة اني اصدق ريال ويتأثر هالكثر
بس اكيد انت تعرف اكثر
لانك تشوف :)
Post a Comment
Subscribe to Post Comments [Atom]
<< Home