gift from god

غرامي اليهال .. يشكلون عندي نقطة ضعف صعب اني اتجاوزها

و من طفولتي كنت اشبع هالغريزة اللي فيني بالقطاوة

وتعلقت فيهم بشكل كبير لدرجة كنت اسميهم عيالي

ورغم حبي لليهال لكن كانت عندي مشكلة باني اتخيل بان في يوم من الايام راح يكون عندي يهال ينافسوني بوايد اشياء

----

---

من صغري كنت دلوعة بابا .. يمكن لان ترتيبي الثانية عندي اخت اكبر كانت دايما المقربة حق امي

وعندي اخو اصغر مني دايما كان محور اهتمام امي

وهالشي اتوقع اللي خلا ابوي يركز كل اهتمامه علي عشان ما احس بأي غيرة

:)

=======

ومن صغري وانا فيني طبع بايخ اللي اهوه اني احب اكون محور الاهتمام واحب اتدلع

كنت اغار من اي احد يحاول يسرق الضوء مني او انه يحتل جزء من اهتمام ابوي

حتى اذكر لما امي حملت باخوي مريت بحالة نفسية وكان مسبب لي عقدة

لدرجة اني كنت اعصب وابجي اذا ابوي لعب مع اخوي او اهتم فيه قبل ما يلعب معاي او يهتم فيني

هالطبع الخايس كبر معاي وانتقل من ابوي الى زوجي

ما عندي مانع انه يهتم باحد غيري

ما دامت الاولوية لي .. ومادمت انا محتلة الجزء الاكبر من قلبه

كنت اخاف اييب ياهل خصوصا بنت عشان اخاف انها تاخذ اهتمام زوجي مني

يمكن لان ادري بعشق زوجي للبنات

=

=

وبعد مرور 3 سنوات على زواجي حملت بجوا

من اول ما حملت لحد ما ولدت كنت محتارة بالاسم شنو اختار

جوا معناه اقصى درجات الحب

واخترته لان يعبر عن شعوري تجاه زوجي وبنتي

وفعلا لما العب معاها او اسولف معاها احس بهالشعور

احس بالحب رغم ان عمرها بس 7 شهور

بس هالمرة احسه صج

مو نفس شعوري تجاه اليهال قبل ما يكون عندي ياهل

مع جوا احس بأفضل حالاتي لانها تذكرني بكل شي حلو موجود بحياتي

ويذكرني اسمها بكل حب موجود بحياتي

والايام اللي طافت كانت حيل صعبة علي

لان من ولادتها و جوا تعاني مشكلة بقلبها

لكن هذي المرة الاولى اللي تدخل فيها المستشفى وانشالله تكون الاخيرة

شكرا لكل من علق عالبوست اللي طاف و حتى اللي ما علقوا

دعائكم وحتى اهتمامكم يعني لي الكثير