الجزء الاخير

زيارة ديما كانت لها تاثير كبير على نفسية دانة

بهالاسبوع كانت تحاول كثر تلهي نفسها بالسوالف والطلعات

كانوا احيانا يجتمعون مع احمد و وليد

لكن قعدتهم تكون عادية مثل اي قعدة بين اصدقاء

انتهى الاسبوع و ردت حياة دانه مثل ما كانت

دراسة في دراسة

كانت تطلع مع صديقاتها بعض المرات

لكن احمد اختفى من حياتها

ما قام يرد على اتصالاتها

حست انه قاعدة يحاول يتجنبها .. يحقرها

حتى الطلعات اللي كانوا متعودين يطلعونها كقروب

ما قام اييلها

حست دانه بالجواب

حست انها ما تشكل بالنسبة لاحمد اي شي سوى اخت

وابتعاده عنها رسالة واضحة منه ان خل تشيله من بالها

مع انها عمرها ما بينت له انه غير

انها تحبه

انها مهتمة فيه

==

في يوم كانت قاعدة بكافيه

تدرس حق امتحاناتها

تشوفه يدخل الكافيه

هالمرة نظرتها كانت غير عن اول مرة شافته

ونظرته كانت غير عن اول مرة

نظرتها كانت تقول انت وينك .. ليش ما تحس

اذا ما كنت اهمك قولي اني ما اهمك

بس حرام انك ماخذ كل هالمكان بقلبي وانت مو مهتم

نظرته كانت تقول انتي وينج

ليش ما تحسين

اذا ما كنت اهمج ما راح اوقف بطريجج

بس بعرف انتي بشنو تحسين

لو بس تدرين شنو بقلبي

يروح صوبها ويكلمها

احمد : شلونج دانه

دانه : بخير وتنزل راسها وتسوي نفسها تدرس

ماتبيه يشوف الدموع بعينها

احمد : سمعت انج بتسحبين اوراقج وبتردين الكويت

دانه : اي .. احس اني ماني قادرة اقعد اكثر من جذي هني

حدي ولهانة عالكويت .. و احس اني ماني قادرة اقعد بروحي اكثر من جذي

يسكت احمد

يبي يحاول يفهم اي اشارة من كلامها

يحاول يطالعها بعينها بس اهيه مو معطته المجال

يقوم احمد من الطاولة

دانه ما قدرت تحبس الكلمة بقلبها اكثر وبغت تسأله اللي كان بقلبها اكثر من اسبوعين

دانه : وين كنت .. طول هالمدة وين كنت

يستغرب احمد وبنفس الوقت يتوتر

شنو راح يقولها

احمد : دانة انا اسف بس مضطر امشي الحين

ويمشي ويهدها

حست انها تسرعت

ماكان المفروض تتكلم او تبين له انه غيابه عنها كان يهمها

ترد الشقة وتجابل التلفزيون

كانت تشوف فيلم love story

لما تسمع جرس الباب

تفتح الباب بدون ما تشوف منو وراه

وتنصدم

دانه : احمد !! .. خير صاير شي

احمد : ممكن ادخل

دانه : اكيد تفضل

يدخل احمد بسرعة وحده متوتر

يقعد على القنفه ويطلب منها تقعد يمه

دانه : احمد شفيك عسى ماشر .. شصاير

احمد : يعني ما تدرين شصاير .. ما تدرين شنو فيني

سألتيني اليوم وينك .. وين كنت

يعني ما تدرين اني قاعد اتجنبج

مابي اشوفج

مابي اسمع صوتج

تسمعه دانه واهيه مصدومة

واهوه يكمل كلامه وكأنها مو موجوده

كأنه يكلم نفسه

واهيه ساكته

: لو تدرين انتي بشنو تحسسيني

اذا كان ببالج اني ما اهتم انتي غلطانه

مثل كل مرة كنتي غلطانه فيها .. اذا بقولج اني اكرهج هالكلمة ماتوفي

تدرين ليش .. لانج ما تحسين

تبين اقولج وين كنت

كنت بروحي

كنت مع الكل بس بروحي

لانج صرتي دنيتي كلها .. لان اذا كنتي معاي الدنيا كلها تصير بعيني غير

من اول مرة شفتج فيها حبيتج .. اذا عبالج ان اول مرة تصادفنا كان بالكافيه انتي غلطانه

شفتج قبلها وبفترة طويلة لكن كنت احاول اتجنج من اول مرة شفتج فيها

مابي احس اني ضعيف يمج .. الشعور اللي احس فيه وانا يمج وانا اشوف عينج يخليني احس باحساس عمري ما كنت اتخيله

احساس اني احبج

احساس اني مابي اقولج اللي بقلبي عشان ماخسرج

احساس ان ....

ويسكت وييرفع راسه

يشوف عيونها غرقانه

دموعها تنزل بدون ما تقول ولا كلمة

يمسح دموعها بيده

يبوسها على راسها ويمشي

يطلع من الشقة وهذي حالتها

مصدومة وبنفس الوقت ماتقدر تمسك دموعها

======

بنفس السنة احمد تخرج من الجامعة و دانه حولت حق جامعة الكويت

كان بالنسبة لها كل شي

وكانت بالنسبه له كل شي

كانوا ناوين عالزواج من اول ما رجعوا من امريكا

لكن ابوها كان رافض زواجها قبل تخرجها من الجامعة

تخرجت دانه و تزوجت احمد بعد قصة حب دامت 5 سنين

جربوا فيها كل المواقف اللي ممكن تصادف اي اثنين

لكن حبهم كان اقوى من كل شي

===

==

==

=

=

=

The End

=

=

==

==

===

انا اسفة ان اسلوبي مو مشوق .. ويمكن القصة تكون مملة بالنسبة لكثرين

حبيت اكتبها لان قبل جم يوم كان تاريخ 28\4

اليوم اللي عبر احمد فيه عن حبه لدانه

.

القصة هي قصتي كنت انا بطلتها وزوجي بطلها

هالبوست كله خاص فيني

كتبته لمجرد ان ابي هالذكرى تنذكر على طول

وماكو مكان احسن من مدونتي

====

HaPpY Anniversary my LOVE