كلام الناس

كنت اتكلم مع وحدة من زميلاتي ايام الدراسة عن الدنيا شلون غيرتنا و شنو كانت طموحاتنا وشنو طموحاتنا الحين
فعلا ايام قبل
ايام الدراسة الواحد ما يكون مستوعب الدنيا الصجية شلون صايرة
شكثر وصخة
----
ايام الدراسة كنا نشوف ان البنت لو وين اشتغلت لو وين راحت اهيه اللي تفرض احترامها على الموجودين
اهيه اللي تخلي الناس تحترمها
ما كنا ندري ان الواقع شي واللي المفروض يصير شي ثاني
----
بعد الشغل اكتشفنا ان السمعة مالها شغل بتصرف البنت
لها شغل باسم البنت
دام ان عايلتج معروفة و لها اسمها فانتي بالسيف سايد
اكتشفنا ان الرياييل يتكلمون ويحشون ويطلعون اشاعات اكثر من الحريم
اكتشفنا ان الوحدة اذا سمعتها اختربت مو شرط ان العيب منها
اكتشفنا ان بهالديرة كل واحد عنده بلاوي
شرب - شقق- شاليهات - بارتيز - قزز - بوي فريندز
متزوجين مو متزوجين
لكن ينسون اغلاطهم كلها و يطلعون نفسهم الملائكة و غيرهم الشياطين
اكتشفنا ان بهالديرة الواحد لازم يخاف على نفسه حتى من الطلعة
ليش ؟
لان الناس ما عندهم غير القيل و القال
غير الاشاعات
غير الحجي والحش
غير فلان يسوي جذي وعلان يسوي جذي
اكتشفنا ان سواء الواحد يعرفك او ما يعرفك راح يتكلم فيك
اكتشفنا ان المجتمع صار موبوء بداء " الحجي "
لا كبير لا صغير
لا ريال لا مراة
لا متزوج او مو متزوج
لا صغير لا كبير
محد يسلم

اكتشفنا ان اهم شي بالديرة الناس اللي فيها
لا خدمات لا معاشات لا ضرايب لا ثقافات
اهم شي الناس
تعاملهم مع بعض .. اخلاقهم مع بعض
فاذا هالشي اختفى
شاللي بقى ؟
ليش الواحد ما يقص لسانه قبل ما يتكلم بغيره
ليش ما يفكر ولو ثانية ان مثل ما يتكلم في احد يتكلم عليه
ليش ما يفكر بالبداية ان احنا مجتمع مسلم
لازم نخاف على بعض مثل ما كان يصير ايام بعض
لازم نستر على بعض اذا شفنا شي غلط
لازم ننصح
وهالشي بصراحة نادرا مانشوفه هالايام

=====
شي ضحكني وخلاني اكتب هالموضوع
وحدة سألتني شلون عيالج
شلون عيالي !!!!!.؟
اي عيال
واكتشفت بعدين ان ناس قايلين لها اني طليقة فلان الفلاني وعندي منه 3 يهال ويا حرام تطلقت منه لانه وايد يخربط و يطقني ويغلط علي
ومتأكدين ان انا مرته حتى كانوا يايين عرسي
عفية مو شي يضحك