NEW ME

الفكرة باختصار

__

ابي اعيش تجربة تخليني اراجع كل حساباتي

تجربة اكون فيها بروحي

اواجهها بروحي

وادخل في بداية يديدة ممكن تغير نظرتي للحياة

بداية تكون الفكرة

__

مجرد حلم حلمته اني عشت حياة يديدة وقلته حق ريلي

و احيانا افكر فيه

شعور اني اعيش بروحي لفترة معينة

وبس

مجرد فكرة وراودتني

هدية عيد ميلادي :

من الهدايا اللي حصلتها من زوجي هدية غريبة

بداية قاللي انه يبي يحقق لي حلم حلمته

و يخليني اعيش تجربة ما عشتها من قبل

الهدية عبارة عن تذكرة ل

HongKong

وسبب اختياره ان عمري ما زرت هالمكان

و مكان راح يكون وايد يديد علي من حيث اللغة والناس وطريقة العيشة هناك

واللي علي اني ادبر نفسي

اعيش اسبوع واحد هناك

بدون احد بدون اي حجوزات للفندق الا لليلة وحدة اللي اهيه الليلة اللي راح اوصل فيها هناك

وبس اللي معاي ال cash money

شعوري :

استانست وبنفس الوقت خفت

صج اني عشت سنة كاملة بامريكا وقت الدراسة

لكن الوضع يختلف

والدولة تختلف

المكان اللي بروح له ما اعرف عنه اي شي

و مو كلهم يتكلمون انجليزي

وراح اعيش لمدة اسبوع بروحي .. بدون زوجي بدون بنتي

بدون ما احد يدري عن هالشي

____________

بداية يديدة

30-1

كانت البداية

كويت - قطر - هونغ كونغ

مدة الرحلة 9 ساعات

بالطيارة ما اقدر انام ولا اتحرك ولا احس اني مرتاحة

قاعدة احاتي من اللي راح اسويه

صج تجربة يديدة

لكنها مو سهلة كلش

وصلت لمطار هونغ كونغ ومن هناك عالفندق

حطيت جنطتي

وخذيت لي شاور

وعلى طول انزل اسأل عن الفنادق و دبرت لي حجز لباجي الاسبوع

لان الفندق الي زوجي كان حاجز لي فيه بعيد شوي عن ال center

ولما أكدت الحجز رحت آخذ لي جولة بالمكان

مكان حيل يديد مكان غريب

رحت كثير دول بس هذي احسها غير

الناس اللي فيها

كلامهم

طريقة بنيانهم

اول يوم ما حسيت فيها

لكن حسيت فيها بالايام الياية

ولهت على زوجي وبنتي وكنت اتمنى لو يكونون معاي

بهالاسبوع عشت حياة غير

شفت اشياء ما كنت اوقع اني اشوفها

احس اني عشت حياة الناس اللي ماعندهم لا اهل ولا بيت ولا شي

كنت اطلع من الصبح واتمشى

اي شي ابيه احاول افهم الناس بالاشارة

على حظي كل ما كنت اكلم احد ما يعرف انجليزي

الاكل ما كنت اقدر آكل من اكلهم

ما اعرف حق عملتهم

و الناس يطالعوني بشكل غريب

كل شي كنت اسويه وكل مكان كنت اروح له بروحي

الشعور الغريب

اني حسيت بالوحدة والراحة

الخوف والفرح

الحزن و المغامرة

كل المشاعر حاشتني بهالاسبوع

اللي صارلي بهالاسبوع وايد

اللي شفته بهالاسبوع وايد

بس الاكيد اني عشت تجربة ما عشتها من قبل

والمواقف راح اتكلم عنها مستقبلا

بالبوستات الياية

وعلى كثر ما كانت تجربة حلوة

ماني مستعدة اكررها مرة ثانية

ماقدر اتحمل اعيش بدون دنيتي

حبيبي وبنتي