Happy New Year

2006

شارفت على الانتهاء

كانت سنة حلوة عموما علي

فيها سافرت وايد

و حملت و ولدت

واول مرة اصير فيها ام

فيها اخوي الصغير سافر يكمل دراسته بره

فيها حسيت اني مرأة

حسيت اني وصلت لمرحلة من عمري لازم اتخلى عن دور الياهل او دلوعة الكل واكون مسؤولة لاول مرة بحياتي

فيها كونت لي قاعدة بشغلي اقدر استند عليها مستقبلا اذا حبيت افتح مكتب خاص لي

فيها تعرفت على ناس ماكنت اتخيل بظروف ثانية اقدر اتعرف عليهم

فيها اختي خلصت دراسة الماستر اهيه وزوجها و يابت لنا بنوتة ثانية

فيها دشيت عالم البلوقات

وفتحت لي مدونة خاصة فيني

2006 كانت حلوة علي

واتمنى 2007 تكون احلى منها

*

*

بالنسبة ل 2007

مبدئيا متفاءلة فيها لان اختي بداية هالسنة راح ترجع الكويت مع زوجها وبناتها الثنتين

من الاشياء اللي اتمنى اسويها

اني اجرب اشياء يديدة ما جربتها .. اماكن يديدة ما سافرت لها

اعيش كل لحظة مع " جوا " بنتي باول سنة لها

اجابل شغلي بضمير مو مثل هالسنة

اكون زوجة وام بمعنى الكلمة

اتمنى عالسنة الياية اروح الحج بما ان هالسنة ماقدرت

اتمنى اني استمتع بكل لحظة وكل يوم من السنة اليديدة

لان وضعي فيها راح يكون وايد غير عن بداية 2006

.

.

واتوقع هالسنة راح تكون غير من بدايتها

خصوصا ان راس السنة راح يكون مع عيد الاضحى

.

.

هل حققتوا جزء من طموحاتكم بال 2006

هل كانت سنة حلوة عليكم

وشنو امنياتكم للسنة اليديدة

اشياء الواحد يفكر فيها ويراجع حساباته فيها في هالوقت من كل سنة

.

.

كل عام وانتوا بألف خير

وعيدكم مبارك

happy new year