موقف أثر فيني

شخصيا اموت بشي اسمه يهال

لما اطلع واشوف ياهل اصير مينونة

ابي العب معاه

ابي احضنه وابوسه واشيله

وهالشي يزيد عندي لما اسافر

بما ان كثير من عيالنا جلحان ملحان :)

===

بالسفرة الاخيرة كنت اموت لما اشوف ياهل

واقاوم نفسي كثر ما اقدر اني ما اروح عنده وابوسه اخاف امه تزفني بلغتهم واصير مهزلة جدام الناس

===

هالموقف من كثر ما أثر فيني قعدت بالسوق ابجي

بالشارع ابجي

ما قدرت اقاوم دموعي انها تنزل على اللي شفته

كنت واقفة عند واجهة محل واطالع اللي بالفاترينا

ولاحظت بيبي اللي اهيه بالصورة اللي انا حاطتها

قاعدة عند المحل وترتب بروشورات المحل

توقعت انها بنت صاحب المحل وقاعدة تلعب بره المحل

لكن انصدمت لما شفت راعي المحل يطلع معصب ويشيلها ويحطها بنص الشارع

الشارع اللي الناس تمشي فيه

انصدمت من قسوة الريال وتأكدت انها مو بنته

فضولي خلاني ادور عن اهل البنت

قعدت اتلفت يمين وشمال اشوف منو ممكن يكون اب او ام هالبيبي

شفت ان ماكو احد مهتم

عورت قلبي

بس قلت اكيد انها ضايعة وكنت اقاوم نفس كثر ما اقدر اني ما اروح اشيلها و اخذها معاي

شفت شرطي كان يفتر قلت اكيد الحين بياخذها

ودخلت المجمع وحاولت اتناسى الموقف

بس قلبي طول الوقت كان يعورني

شلون ما خذيتها

شلون خليتها بروحها

واحاول الهي نفسي باني اشتري واتمشى بين المحلات

طلعت من المجمع عقب ساعتين

كانت الدنيا ظلمة

اول شي فكرت فيه

وين راحت البيبي ؟

قعدت اتلفت وادورها ولا اشوفها للحين موجودة قاعدة تتمشى بين الناس واي ياهل تشوفه تلعب معاه

ما كانت تبجي

بس كانت ضايعة

الناس يمرون يمها ولا مهتمين

ماقدرت اقاوم دموعي بهاللحظة

حسيت اني عاجزة اني اسوي لها اي شي

وكنت خايفة اني اقرب منها واشيلها و احد ايي يبلشني بشي

قعدت على كرسي وقعدت ابجي

حسيت بهاللحظة اني صج بروحي

حسيت ان ما مني فايدة

حسيت اني على كل اللي عندي بس في اشياء ماقدر اغيرها

و وجودي بهالموقف من عدمه

ما كان له معنى ولا أثر

رفعت راسي ولا اشوفها قاعدة عالسلم جدامي وتطالعني

جان اطلع الكاميرا واصورها

ما قدرت اوخر من جدامها الا لما شفت ياهل صغير يه عندها وقعد يلعب معاها

واهله عطوها اكل و قاعدين يلعبون معاها

حسيت اني الحين اقدر امشي وارد الفندق

واول شي سويته اني اتصلت على ريلي وقلتله حط سماعة التلفون عند اذن جوا

ابي اكلمها

صج انها ما تفهم

صج ان عمرها بس 4 اشهر

بس محتاجة اني اكلمها واقولها ان امها راح تكون على طول موجودة معاها وعشانها

الموقف اللي صار هذاك اليوم

غير فيني شي

كسر فيني شي و رد فيني شي

و حسسني بنعمة انا عايشتها وشلون لازم اقدرها واحمد ربي الف مره عليها