رجولة الرجل وانوثة المرأة

على الرغم من تحرري الزايد و نظرتي الفري لكل شي

لكن في حدود لكل شي

من الحدود اللي شخصيا حاطتها لنفسي

دور الرجل و دور المرأة

في نظري كان ولازال ان للرجل مكانه خاصة واحترام خاص لازم يكون له

و على الرغم من دعمي الكامل لحقوق المرأة و وقوفي دايما بصفها

الا اني اشوف ان المرأة لازم او واجب عليها ان تحترم الرجل و في حدود لازم ما تتعداها معاه

استغربت من الوضع اللي صاير حاليا يتعلق برجولة الرجل و انوثة المراة

وين صاروا حاليا ؟؟

شلون يرضى ريال طول وعرض مرته تسبه وتغلط عليه ؟

وشلون المرة ترضى على نفسها توصل لمستوى انها تغلط على ريال جدامها

انصدمت من تفكير عدة بنات اعرفهم او مروا علي

ان عادي عندهم يسبون ربعهم او رياييلهم

والمشكلة مو اي سب

سب وصخ لدرجة ان عمري ما افكر اقوله حق بنت اللي اتجرأ واقوله حق ريال

واللي استغربته ان الرياييل يمشون السالفة عادي

وين رجولتك ؟؟

شي نرفزني ان البنات يشوفون ان شي عادي انهم يسبون الريال

لمجرد انه نرفزهم

عمري ما كنت اتخيل ان ممكن ارفع صوتي على ريال

او اسبه

لمجرد ان اشوف ان الريال له مكانه خاصة

الحين احس ان الحريم يبون ينافسون الرياييل على كل شي

حتى الاسلوب الدفش والخشن

يعني يكلمون الرياييل جنهم واحد من الربع

ماكو احترام

هل هذي غلطة الحريم لانهم نسوا ان في حدود لازم ما يتعدونها

ولا غلطة الرياييل اللي نسوا انهم رياييل و فقدوا احترامهم وقاعدين يسمحون انهم ينسبون عالطالعة والنازلة واهمه ساكتين ؟